काठमाडौं : कीर्तिपुरमा भएको बस दुर्घटामा त्रिभुवन विश्वविद्यालयका कृषि अध्ययन संस्थानका प्राध्यापक डा. गोविन्द रिजालको मृत्यु भएको छ। उपत्यका प्रहरी कार्यालय रानीपोखरीका प्रवक्ता दिनेशराज मैनालीले बस दुर्घटनामा प्राध्यापक डा.रिजालको मृत्यु भएको पुष्टि गरेका हुन्। उनको आइतबार अपरान्ह ३ बजेर १० मिनेटमा कीर्तिपुर अस्पतालमा मृत्यु भएको हो।
आइतबार दिउँसो कीर्तिपुरबाट रत्नपार्क जाँदै गरेको बा.३ ख.२०२७ नम्बरको बस कीर्तिपुर आर्युवेदिक अस्पताल अगाडि दुर्घटना भएको थियो। दुर्घटनामा तीनजना घाइते भएका छन्। घाइतेमध्ये दुईजनाको कीर्तिपुरमा र एकजनाको ट्रममा सेन्टरमा उपचार भइरहेको छ।
ट्रमा सेन्टरमा बसका चालक २७ वर्षीय रमेश लामाको उपचार भइरहेको छ। उनको दाहिने खुट्टामा चोट लागेको छ। दुर्घटनाका बारेमा अनुसन्धान भइरहेको प्रहरीले जनाएको छ।
Source: Annapurna Post